برانيط حبنا..ترتر حبنا..حنطور حبنا

بمناسبة زواج الامير ويليام وكيت ميدلتون امبارح, وبتوصية من صديقتى ايه..قررت اعمل مقارنة بين الفرح الملكى والافراح عندنا هنا فى مصر..

اولا كده يعنى, وانا قاعدة باتفرج, اتشليت من الصمت الرهيب المحيط بالناس دى..على رأى اتش دبور..الناس دى "صامتة وغامضة"..عندنا احنا هنا الواحد لو حضر فرح ولا خطوبة ولا حتى كتب كتاب صغير لازم يرجع البيت وهو عنده انسداد فى الاذن الخارجية والداخلية والوسطى ولو كان فيه جزء رابع كان هيتسد هو كمان..زغاريط ورغى ورغى وزغاريط..وما بين كل زغروطة وزغروطة حبة رغى..وما بين كل رغى ورغى زغروطة..انما فى الزفاف بتاع ويليام مشوفتش حد فتح بقه حتى عشان يتاوب!!

ننط لنقطة تانية...أكتر حاجة كانت فعلا ملفتة للانتباه وملعلعة كده كانت البرانيط بتاعة السيدات!

انا شفت كم برانيط فى اليوم ده مشوفتوش فى حياتى كلها..هم عندهم برانيط برانيط برانيط..واحنا عندنا زغاريط زغاريط زغاريط!

المهم بقى..البرانيط دى من كل لون وشكل..ومن كل حدب وصوب..

اشى برنيطة تخينة, واشى برنيطة رفيعة..برنيطة عريضة وبرنيطة دقيقة..برنيطة طويلة وبرنيطة قصيرة..اللى بفيونكة واللى بشريطة..اللى عليها فواكه واللى عليها خضار..وهاتك يا برانيط

يا برانييييطك يا انجلترااااا

فى رأيى الشخصى, أعتقد ان البرانيط دى تم تصميمها لأكثر من غرض

برانيط "مالتى بيربوس" يعنى

فى برانيط معمولة مخصوص زى كاسة الشوربة كده, تم تصميمها خصيصا للسيدات اللى عندهم عيال..تحط الطفل فوق فى البرنيطة وتعيش حياتها زى ما هى عادى..خصوصا فى حالة الشوبينج..احنا عندنا بنحط العيال على شبكة الميكروباص من فوق, وهم بيحطوهم فى البرانيط.

فى برانيط تانية طويلة اوى وليها حاجات كده زى قرون الاستشعار..أعتقد انه كان ريش فرخة عندها تلبك معوى حاد..البرانيط دى بقى بتستخدم فى المناسبات الهامة جدا, وفى تنظيف سقف البيت فى نفس ذات الوقت..يعنى الست تتشيك وتلبس وتحط الميك اب بتاعها وقبل ما تنزل تنظف الاركان بتاعة السقف وبعدين تحط البرنيطة على راسها وتنزل...قمة الشياكة!

بالنسبة لأغلبية السيدات فى حفل الزفاف ده..كانوا مقضيين الحفلة عميانى..بمعنى اخر, لاحظت ان تلات ارباعهم كانوا لابسين برانيط واصلة لحد مناخيرهم ونازلة على عينيهم..كده يبقى حاجة من اتنين..يا اما كانوا عاملين فتحتين للعينين فى البرنيطة زى البتاعة بتاعة النينجا تيرتلز..يا اما عندهم قرون استشعار بيتحركوا بيها..انما لا يمكن يكونوا كانوا شايفين اللى حواليهم البتة!!

الظريف بقى انه بالاضافة للبرانيط, اللى هى كانت الاساس فى اللبس, لبسهم كان كله شبه بعضه وبسيط جدا..هى حتة قماشة متفصلة على فستان حطوها فى الة نسخ وعملوا منها نسخ تكفى الشعب الانجليزى..انما عندنا هنا, الواحدة مننا اول ما تعرف ان فيه فرح, لازم تلبس كل اللى على الحبل عشان هى دى الشياكة..ونظام "شفتى مش ام عفاف هتلبس ال"بورورو" بتاعها على الطقم الجتشيد ؟شكلى كده هضربلهم الطقم الاحمر ابو ترتر ومعاه الجزمة الصفرا ام ترتر والشنطة الخضرا اللى عليها ترتر عشان الفت عيون المعازيم". 

تعليق صغير:حبيبة قلبى..انتى كده هتعميهم, مش هتلفتيهم.

ده غير ان اى فرح فى مصر معناه:

-الست رايحة تشوف عروسة لبنتها

-البنت لازم تلبس اللى عالحبل عشان تبقى لقطة والستات اللى بيدوروا على عروسة لأولادهم تعجبهم

الفرح اللى شفته امبارح مكانش فيه ست ماشية تفتش فى وسط البنات على عروسة لابنها ..ولا لقيت مثلا ام فوزى وام سناء قاعدين فى كورنر فى الفرح هاريين ودن بعض:"بص يا بت يا صفية شوفى البت كيت دى عاملة ازاى..عقبال بنتك يا حبيبتى.." وام سناء تقول لها:"عقبال ابنك فوزى كده اما يكون شبه الواد ويليام يا حبيبى ونلبسه احمر فى اصفر برضه ان شاء الله يا حبيبتى, بس تصدقى فستان البت كيت كان ناقصه شوية ترتر كده عشان يزهزه."

تعليق:نفسى اعرف مال المصريين والترتر..اى حاجة فيها ترتر..كمان شوية هنسمع عن الملوخية بالترتر والمحشى بالترتر.

من هذا المنطلق ننطلق الى منطلق اخر انطلاقا مطلقا..

الناس فى الفرح كانوا قاعدين فى الفرح للفرح ذاته..

الناس عندنا هنا بيروحوا الفرح لغرض واحد....البوفيه!

تلاقى اكتر حاجة شاغلة اهل العروسة والعريس هى البوفيه..طب المعازيم هياكلوا ايه؟طب هيبقى اوبن بوفيه ولا نخليه اطباق وتتوزع عالترابيزات؟طب نجيب ديك رومى ولا خروف محشى..

ده غير ان الناس بقى تفضل قاعدة طول اليوم من غير ما تاكل لقمة عشان خاطر "معلش اصل عندى فرح بالليل..عشان البوفيه"..

وعلى فكرة عادى يعنى..أنا شخصيا اعتقد ان يوم فرحى هسيب العريس فى الكوشة وهطلع عالبوفيه دوغرى..واول ما يخلصوا هم الفرح بره يبقوا يندهولى بقى!!

اما بالنسبة للجو نفسه بتاع الفرح..الناس دى امبارح كانت عايشة فى مود كده عظيم...كورال..والنشيد الوطنى واغانى هادية وتراتيل..والناس ماسكين ورق وبيغنوا مع بعض منه كده بانسجام

اما عندنا..اول ما يبقى فيه فرح..لازم ننقى كل الاغانى البيئة والشعبية ونشغلها فى الفرح عشان نعرف نهيص..

ولو جه العريس او العروسة مثلا عايزين يشغلوا اغنية لسيلين ديون او لجورج مايكل , تلاقى المعازيم كلهم بيحدفوهم بالطماطم وتلاقى صديق العريس رايح يقول له":ايه يا عم سريانوسى..خليك شيعبى اومال"!!

وتلاقى سعد القصير وعلى عالوكة واشرف كخة هم اللى بيحيوا الحفل بأغانى مثل العنب العنب, وليالى الندم, وسنين السواد..او روائع محمد محيى زى "قادر تندمنى على الايام..عالعمر ضيعته على الاوهااااام"..

تعليق:الرومانسية المصرية فى اوجها..وقد يتدخل عمر دياب فى بعض الاحيان بما ان تمورة راحت عليه خلاص

اول ما كيت وويليام خلصوا المراسم, خرجوا ركبوا عربية تجرها الخيول..(اللى هى الحنطور عندنا من الاخر اللى بيركبوه فى نادى الشمس فى شم النسيم بس بيبقى صندوق فراخ بيجره حمار بتلات رجلين وعين واحده, مش زى اللى كانوا راكبينه ده)

ومشيوا فى صمت..وعمالين يشاوروا مش اكتر..انما عندنا احنا هنا اول ما نخلص الفرح لازم العربيات كلها تنطلق "تيت تيت تيتيتيييت تيت تيت تيتيتيييت" عشان نعرف التمانين مليون مواطن ان فيه واحد منهم اتجوز..ولازم نشركهم كلهم فى اللحظة دى سواء هم عايزين او مش عايزين..مفيش مجال للاختيار..

بالنسبة للاستاذ هارى شقيق الاخ ويليام...انا مشوفتش بنت واحدة بس بتغمز لصاحبتها مثلا وتشاور ولا واقفين من بعيد كده يتكلموا زى البنات..انما اتخيل ان لو هارى كان عندنا كان زمان البنات كلهم اللى لابسين فوسفوريك واخضر واحمر واصفر بترتر حوطوا الولد و كله فى نفس واحد "بنااااااات....هجووووووم"! وكان غالبا الولد هيطلع من غير الجاكتة والشريطة الدهبى دى ملفوفة حوالين رقبته ومن غير جزمة ...واصلع!!

طبعا مفيش مجال للمقارنة بين الفرح بتاع امبارح والافراح المصرى..ومع ذلك انا بحب الافراح عندنا هنا..لأن فيها حياة وروح..مهما كان شكلها..الناس كلها بتهيص مع بعضها..والناس كلها بتفرح لبعضها..لما الناس تلاقى عربية عروسة فى الشارع, بيمشوا يزمروا مع اهل العروسة من غير ما يكونوا عارفينهم..وبينبسطوا لهم بجد من غير ما يكون فى اى علاقة بينهم اساسا..

الناس هنا لما بتفرح بتفرح بجد..بتفرح لبعضها..

البوفيه بيتعمل لأنهم بيحبوا ياكلوا مع بعض..والاغانى بتتعمل لانهم بيحبوا يهيصوا مع بعض..

الزمامير بتتعمل, لأنهم عارفين ان الناس هتفرح لهم حتى لو ميعرفوهمش..

الناس هنا بتحب تفرح لأن هى دى روحهم..روح الكرم

روح البساطة وروح السعادة النقية..

روح المشاركة, والحب الاخوى..

هى دى الروح المصرية..روحى اللى بحبها فيا..وبحبها فى كل واحد مصرى..

هى دى مصر :)

سارة محمد هشام خاطر

30-4-2011