ميدان التحرير...لسه فاكره؟؟

من حاجة بتاعة شهرين كده صحيت خير اللهم اجعله خير يعنى على خبر ان فيه ثورة فى البلد..

وبما انى عشت 20 سنة من ال30 سنة اللى ابو عيلاء حكمنا فيهم..فأنا طبعا بحكم العادة قلت خلاص يعنى...سووو وااات؟ده تلاقيهم شوية شباب كده عايزين يغيروا جو..وهيقفوا شوية كده وبعدين هتتحول صيحاتهم الى "لف وارجع تانى..يا سلام يا سلام يا سلام..ايه البواخة دى" وبعدين الموضوع ينام على عينيه (كالعادة المعتادة برضه)..ونصحى تانى يوم على أخبار التليفزيون المصرى بيقولنا ان مكانش فيه مظاهرات ولا اى حاجة امبارح, ودى كانت مجرد تهيؤات بسبب حرارة الشمس المرتفعة والتى انعكست اشعتها على الارض, متسببة فى ظهور خيالات لأشخاص ماسكين شعارات وحواليهم أمن مركزى..وكالعادة برضه كنا هنصدق التلفزيون المصرى ونتغاضى عن الموقف بأكمله.

اللطيف بقى انى شوية كده وفوجئت ان الاخبار ابتدت تسخن, والاعداد ابتدت تزيد..والمظاهرات شغالة..

كان فيه من جوايا اوى من الاعماق صوت بعييييد كده, كنت حساه شبه صوت ضميرى وانسانيتى اللى ناموا بعد 20 سنة من الحكم الضال للأستاذ الجليل المغوار صاحب اللطشة الجوية اللى فلقونا بيها, الأستاذ ابو عيلاء..الصوت ده كان بيقوللى "على فكرة..شكلها كده هتشتغل بجد!"..وانا دماغى اللى تغلغلت فيها افكار الانهزامية وال"استقرار" بتاعة حكومتنا المبدعة قعدت تقوللى "لا يا راجل..تشتغل ايه وبتاع ايه..ده اكيد العيال دى شوية وهتتخنق وتنام", وضميرى ينده "يا ستى بلاش سلبية بقى بصى كده..ده شكله بجد"..

على بليل, لقيت الناس بتقوللك ده فيه اعتصامات وابتدا يبقى فيه ضرب..ويمكن يقفلوا الجامعات والمدارس وجو كده لم أشهده الا في كتب التاريخ بتاعة المدرسة اللى ادتنا شعور ان الحاجات دى زى افلام الفانتازيا والخيال العلمى..لا وجود لها فى الحقيقة..

كان عندى امتحان وبصراحة كده بينى وبينكم كان نفسى الامتحان يتلغى وناخد اجازة بقى وننعنش ونستعد لترم تانى من المناهج الدراسية المتخلفة عقليا التى توقظ "أس" الغباء فى اى طالب..

للأسف الشديد..وكم يؤلمنى انى اقول كده..بس الاعتراف واجب لأن الدنيا اتغيرت, وانا اتغيرت معاها..للأسف الشديد, مكنتش مهتمة بأى حاجة فى البلد, ولا همانى الحكومة دى بتاعة مين,ولا مين عمل ايه فى ايه,وكنت من العيال اللى كانوا بيتفرجوا على برامج "ماما عبلة" و"ماما سامية" و"ماما عطيات"و"ماما فوزى" و"ماما برعى" وكل الماماهات اللى طلعوا فى التلفزيون المصرى, واللى كانوا بيقدموا برامج هدفها الأول والأخير هو زرع بذور التخلف والغباء فى عقليات الأطفال النقية..ومكنتش من هواة الأخبار والبرامج الاخبارية.وبالتالى كنت فى حالة من الغيبوبة اللى معظم المصريين كانوا فيها على مدار 30 سنة من التنويم "الطغطاطيسى" اللى النظام السابق كان بيعمله لشعبه.

مرت الايام, والاحداث تتصاعد بشراسة..ولقيتنى اوتوماتيكيا مهتمة بانى افضل فاتحة القنوات الاخبارية..ولا ام بى سى بقى ولا روتانا ولا التفاهات دى تانى..الحمد لله ابتديت حبة حبة كدة افوق للى كان بيحصل حوالينا وانا مش دريانة..او يمكن كنت دريانة بس عايشة فى حالة من النكران-او التنميل-واللى وصل لمرحلة الشلل الرباعى.عرفت الدنيا كان فيها ايه, والوزراء اللطاف دول , وبلاويهم..وكل اللى كان بيحصل من تحت لتحت فى الصرف الصحى والشعب فوق فى القهاوى مشغول بماتشات الكورة, الحاجة الوحيدة اللى كانت بتجمع المصريين مع بعض.

المهم, فعلا لأول مرة أحس بمعنى كلمة "وطنية" بجد..شفت الوطن اللى كان نفسى أشوفه فى اى مكان على مدار 20 سنة, شفت الوطن ده فى التحرير..ميدان التحرير..

ميدان التحرير اللى لو حد فيه خبط فى حد تانى كان بيقول له انا اسف..

ميدان التحرير, اللى مفيش بنت فيه كانت بتتعاكس من ولد

ميدان التحرير, اللى المسيجى كان بيحمى فيه المسلم وهو بيصلى, والعكس صحيح..

ميدان التحرير, اللى المصريين كانوا بيقسموا فيه رغيف العيش مع بعض, مش بيقفوا يتخانقوا فى طابور..

ميـــــــــــدان التحريـــــــــــــــــــر..

فاكره؟؟

المكان اللى الشهداء سقوه بدمهم عشان بذور الحرية تنبت من تحت أشواك الظلم والطغيان والكراهية..

المكان اللى وقف فيه الناس ايـــــد واحدة, بيحموه من المخربين وأتباع النظام الغوغائى القمعى

المكان..اللى المصريين كلهم فيه بقوا واحـــــــــــــــــــــــــــــــــــــــد

ومحدش قدر عليهم..

ولا غاز مسيل للدموع

ولا رصاص مطاطى

ولا رصاص حى

ولا عصيان

ولا رطش وطوب

ولا سنج ومطاوى وسكاكين وآلى

....

ميـــــــدان التحرير..

اللى وصل قلوب المصريين ببعض..

اللى عرفهم أد ايه كلهم بيحبوا بعض..

اللى الناس كلهم فيه احتفلوا فى نفس ذات اللحظة مع بعض  أول ما مبارك اتنحى..

ميــــــــدان التحرير..

اللى المصريين كلهم وقفوا ينظفوه مع بعض, لحد ما بقى أنظف من اوض بعض الشباب !!

بقى بيلمع لانج وبهرنا بيه الغرب والشرق والبلاد كلها..

لأول مرة شعب يثور وينظف بعديه!!

فاكرين الميدان ده؟؟

الميدان ده, اللى بدأ برسالة فيس بوك..

ووصل للملايين من المصريين اللى تجمعوا فيه فى مظاهرات مليونية

وانتهى- أو لسة منتهاش- بمبارك وعائلته ونظامه فى طره..

وكل واحد فيهم بيسأل نفسه " يا "طره" أنا بعمل هنا ايه؟" وكل واحد فيهم بيغنى ظلموه, ونار يا حبيبى نار.

يا مصرى..

اوعى تنسى ميدان التحرير..

اوعى تنسى روح ميدان التحرير..

اوعى تنسى لما ساعدت حد عشان يعدى الشارع

او لما اديت واحد عطشان ازازة الميّة بتاعتك عشان يشرب, مع انك مشوفتوش ابدا فى حياتك قبل كده

او لما خليت البنت اللى جنبك تعدى الاول ومخليتش حد يخبط فيها..

اوعى تنسى الشهيد اللى زقك واخد الرصاصة فى قلبه بدالك..لأنه واثق انك هتقدر تكمل المشوار حتى بعد موته..

يا مصرى..

اوعى تنسى روح التحرير..

اوعى تنسى احترامك للغير..ولما مكنتش بترمى زبالة فى الشارع..

اوعى تنسى لما كنت بتضحك فى وش اخوك المصرى اللى عمرك ما قابلته فى حياتك

كلمة "صباح الخير" و "حضرتك محتاج مساعدة؟"

مش معنى اننا وصّلنا مبارك للسجن, ان دى النهاية..

دى لسة البداية..

بداية التغييــــــر..

بداية التقدم..

بداية التطور..

بداية الاحترام...

بداية اثبات الذات المصرية كذات يجب على الجميع احترامها وتقديرها..احنا خلاص اصلا أثبتنا نفسنا, قدام الغرب, وقدام الشرق, قدام الكل....والأهم اننا اثبتنا نفسنا...قدام نفسنا..

رحم الله شهداءنا..وسدد خطانا على الطريق الصحيح..

ابدأ بنفسك...غير نفسك..

واوعى تنسى روحك الحقيقية..روحك النقية

روحك...روح ميدان التحريــــــــــــر