انت ثانوية عامة؟!عليه العوض ومنه العوض!

دلوقتى انا فى الجامعة..وطبيعى بما انى فى الجامعة, انى اكون مريت على المراحل اللى قبل الجامعة..بدءا من كى جى مرورا بابتدائى وبداية العذاب الاسود فى منظومة التعليم المصرى..وصولا الى اعدادى-مدخل الجحيم- لحد ما وصلت بسلام الى الجحيم شخصيا..الثانوية العامة...بعبع كل بيت مصرى..مؤرق النوم..محطم الاحلام..وناسف الميزانية!

المفروض لو كان التعليم عندنا عدل, كان زماننا بعد اللى بيحصل معانا فى ثانوية عامة ده بقينا عباقرة او مكوناش هنحتاج الجامعة اصلا! خصوصا طلبة العلمى رياضة والعلمى علوم..(أنا شخصيا كنت من اتباع قسم علمى علمك) والادبى فى بعض الاحيان..

منظومة التعليم عندنا كالتالى:(واقتبس من دكتورة عندنا فى الجامعة)...تدخل الطالب بكتب وبدلة وتطلعه من الناحية التانية بودنين طوال.!

وده حقيقى, لأن الملاحظ هو اننا واحنا فى المدارس بنذاكر لهدف واحد فقط لا غير..الامتحان(ده اذا الطالب كان كريم بما فيه الكفاية انه يذاكر عشان الامتحان..يعنى ممكن يوفر فى مجهوده برضه ويقضيها نظرات من ورقة لورقة لحد ما يعمل كوكتيل اجابات ابن ناس كده)

الطالب يفضل يصحى كل يوم من الصبح بدرى عشان لو اتأخر هيتعاقب وكل من هب ودب هيزعق فيه وكده (بعد مرور فترة طويلة من نفس السيناريو, العيال زهقت ومعادتش فارقة معاهم اصلا بقى التهزيء عامل زى كوباية النسكافيه بتاعة الصبح) وبعدين يروح الفصل,المدرسين يفضلوا يهاتوا طول اليوم فى "مين اللى قتل كليوباترا"و "ابن خالة عمتها اتجوزها ليه","والفرح كان الساعة كام" ومناهج غير منطقية البتة! والطالب ينام ويحلم بالغدا اللى طنط والدته هتعمله فى اليوم ده..وبعدين يروح بيتهم يقعد على الفيس لحد ما ربنا يفتح عليه ويقوم ينام.

اما بالنسبة لطالب الثانوية العامة فالموضوع يختلف تماما..الشخص ده بيمر بتحول تام وحياته بتنفصل عن الحياة الخارجية لمدة سنتين..زى الخفاش كده, تلاقى الحيوانات كلها بتصحى الصبح واول ما تنام بالليل, التانى ده يصحى بقى..

طالب الثانوية العامة بيقضى 99% من وقته فى السناتر عشان الدروس عشان المناهج الفاكسة اللى المدرسين مش بيدرسوها فى المدارس..وتتمحور حياته بأكملها حوالين السناتر دى..وينسى بقى خالص سيناريو انه يروح المدرسة الصبح والكلام ده لأن كده ولا كده المدرسة ملهاش لزمة اصلا..

الطالب ده, بياكل اكل غير الاكل,لأنه اصلا عايش حياته برة..بيقضيها كله من عند عبده تلوث لحد ما بيوصل للجامعة وهو عنده كل انواع البكتيريا فى جسمه لدرجة ان جسمه بيكون اتعود على عبده تلوث ويوم ما ياكل من البيت بقى حاجة نظيفة..تلبك معوى ودربكة والتهاب فى الجهاز الهضمى وعينك ما تشوف الا النور!

الطالب ده ميزته هى التوفير..لأنه بيعيش السنة كلها بقلم واحد لا غير..هو قلم يتيم بيجيبه فى اول السنه, وبيفضل محطوط فى جيبه من اول السنة لحد اخر تالتة ثانوى..واللطيف بقى ان القلم مبيخلصش اصلا..معجزة ثانوية عامة!

اى حد طالع ثانوى لازم يحط حاجة مهمة جدا فى باله..يا اما هتخس اوى

يا اما هتتنفح اوى!!

وانت وحظك..فيه ناس من كتر الحركة بتختفى حتى لا يمكن رؤياها بالعين المجردة..وفيه ناس بتنفش

انا شخصيا اتنفشت نفشة سودة وقت الامتحانات!!فراغ بقى واذ فجأة اصلا مواهب الطبخ المستخبية قررت تطلع والسندوتشات والبان كيكس و العك ده كله..وطبعا, مما نلحظه, ده معناه ان الطالب مسار حياته فى البيت بيبقى طريق محدد واحد فقط لا غير..من الاوضه للتلاجة وممكن يعنى من التلاجة للاوضه(واذا افتكر ساعات بيخش الحمام, او ممكن ينسى)

بالنسبة لموضوع النسيان ده عادى على فكرة..الثانوية العامة هى بداية الزهايمر المبكر لكل المواطنين المصريين, فأنا مش عايزة اى حد يقلق لو نسى اسمه فى مرحلة ما..

تكفى اصلا المناهج اللى بيدرسوها العيال...يعنى انا كان مالى اعرف لون البيجاما اللى ارشميدس كان لابسها قبل ما يخش يستحمى ويكتشف قانون الطفو, وجايبها منين وبكام؟

ولا اعرف مثلا الدبانة بتتصرف ازاى فى حالة ضعف الابصار عشان تكاليف النظارة هتبقى كتير؟

ولا نابليون بونابارت وصى الست والدته تعمله ايه عالغدا عشان لما يرجع من الحملة الفرنسية يتغدا على طول؟

انا ماااااااااالى؟

امتحانات ثانوية عامة اللى كانت على سنتى كانت قمة فى الهلوسة..امتحان  الفيزياء جابلى فيه سؤال عن بيت وداخل عليه اعصار, البيت شباكه معمول الوميتال والسقف قراميد وكان فيه ستارة خضراء وكلب برة اسمه ركس..قلت هلاقى السؤال بعد كده الارضيه كانت خشب ولا سيراميك؟لقيته بيقول لى احسبى الضغط من جوه البرة (ومش "من جوه لبرة" عشان ده مش خطأ مطبعى..هى فعلا "من جوة البرة") بتاع البيت, وبعدين سرعة الاعصار كام عشان فيه وراه معاد مينفعش يتأخر عليه!!

مرارتى!

وبعد كده برضه كان فيه سؤال تقريبا بيسأل فيه عن لون المايوه بتاع واحد كده مش فاكرة اسمه اخترع قانون كده مش فاكراه برضه..وفيه فى النص جابلى سؤال عن مغناطيسين مين فيهم هيجذب اكتر عشان واحد على شكل براد بيت والتانى على شكل توم كروز!!

وزارة التربية والتعليم فعلا تفوقت على نفسها فى الاسئلة السنة دى بالذات!  هى دفعة نحس اصلا..وكل اللى كانوا فى الدفعة دى عارفين التراجيديا! :D

بصوا بقى...عشان انا زهقت من الكتابة..من الاخر..عليه العوض ومنه العوض..هم سنتين كده تتنسوا فيهم حبة لحد ما تعودوا للحياة الواقعية مرة اخرى..

مع ان نفسى بجد والله الاقى ثانوية عامة اتعدلت بقى عشان كفاية بهدلة فى العيال!

وربنا يستر!

اهداء خاص لكل طلبة الثانوية العامة, واللى داخلين عليها السنة الجاية ان شاء الله :D >:)

*مجموعة ضحكات شريرة*

سارة محمد هشام خاطر

3-5-2011