انت سقت فيها؟ انا سقت فيها!

أيها الأخوة المواطنون..نظرا للظروف المريبة التى تمر بها ال.........

ايه ده! ايييه ده؟!

واضح ان الثورة أثرت فيّا جامد!

الطبيعى انى اقعد اكتب فى مقدمة عشان اعرفكم انا هتكلم عن ايه..ده حسب قوانين الكتابة..بس انا بقى مش هكتب مقدمة!

من النهاردة..أنا القانون! أنا اللى دهنت الهوا دوكو!!

لأ لأ كده اوفر اوي! حسانى قلبت على حسنى مبارك اوى!ياى!

هغطس فى الموضوع على طول عشان مبحبش أرغى كتير..

أخيرا قررت اتهور واتعلم سواقة بعد تجاربى العظيمة مع المترو (أو التوكتوك أو الترام أو التروماى أو البطوطة أو سميها زى ما تسميها..احنا دلوقتى فى بلد ديمقراطى!), وبما ان سواقتى كانت مفزعة بالنسبة لماما, قررت انى اروح مدرسة سواقة..حيث القلب الميت, والعربيات الميتة أيضا!

 دلوقتى لأى مواطن نفسه يسوق فى شوارع مصر..لازم يكون عارف عدد من "اتيكيتات" الشارع وقوانينه..طبعا بما انى مش خبيرة فى السواقة, مكنتش بعمل الاتيكيتات دى , يعنى مثلا لو شفت حد بيعدى الشارع كنت بهدى العربية عشان يعدى, ولو لقيت عربية جنبى عايزة تخش يمين مثلا كنت بهديلها عشان تعدى وامشى انا بعد كده..و لو فى عربية عايزة تركن أو عايزة تطلع من ركنتها مكنتش بقعد ازمرلها واقلبلها نور..بعد كده بقى اكتشفت انى كده غلط جدا..

يااا جماعة..لو فيه أى حد عايز يتعلم سواقة لاااازم يتبع القوانين دى:

1-فى حالة انك بتجرى بالعربية ولقيت حد بيعدى الشارع..زود السرعة واجرى عليه وافضل وراه لحد ما تجيبه..ولو سألوك فى التحقيق انت عملت كده ليه قول لهم "الكاميرا الخفية".

2-فى حالة ان في عربية مدياك اشارة عشان عايزة تنزل يمين او شمال, اوعى(وبتّك على اوعى دى)..اوعى تخليها تعدى..اكبس معاها بنزين كل ما هى تزود سرعتها, وهدى كل ما هى تهدى سرعتها, اهم حاجة انك تخليها تفوت المكان اللى هى كانت عايزة تخش منه..غلاسة مش اكتر

3-اوعى تسكت وانت بتسوق, كل ما تعدى جنب حد لازم تشتمه او تفتعل معاه خناقة وخلاص..وأول ما يبصلك بص الناحية التانية بسرعة..ولا من شاف..ولا من درى

4-لكل الشباب..مينفعش تسوقوا العربية فى هدوء...لااازم تشغل اخر اغنية لدافيد جيتا او بيونسيه على الكاسيت, وترفع الصوت على الاخر وتحط نظارة الشمس على عنيك..وتقف جنب اى عربية فى اى اشارة وتتنح..انت كده كوول.

5-لو لقيت اى عربية عايزة تطلع من الركنة..اوعى تديها الفرصة..خليك دايس على الكلاكس كأنك دست على صرصار وخايف ترفع الشبشب..واكبس بنزين..ووانت معدى جنب العربية بص للسواق بقرف وتنح..كأنه لسة طالع من بلاعة مثلا.

6-لو الشارع اتجاهين..سيب الاتجاه اللى المفروض تمشى فيه, وروح امشى فى الاتجاه المعاكس..مش صح انك تمشى فى الاتجاه الصح..كده ضد الاتيكيت

7-أخيرا وليس آخرا..لازم تتقمص القعدة الستايليش للسواقة..نظارة الشمس اللى انت مش شايف منها حاجة على عينيك, ايدك الشمال ممدودة على الاخر على الدريكسيون كأنك بتعمل تمارين ستريتش لعضلاتك..ولازم تطلع مع الايد دى حتة كتف كدة لفوق كأنك رفعت كتفك ونسيت تنزله..دور نص جسمك ناحية اليمين..وبص على اى حاجة تانية غير الطريق..الكاسيت..سندوتشات الفول والطعمية اللى لسة جايبها من الشبراوى..صباع رجلك الصغير..المهم متبصش على الطريق..

انا فاضلى كده اطلع الرخصة..وبحسب الاتيكيتات اللى اتعلمتها..اتوقع ان اختبار القيادة هيكون كالتالى:

1- هتركب عربية و يسيّبوا ناس فى الشارع..لازم تدوسهم كلهم ومتسيبش حد يعدى للناحية التانية

2-لازم العربية تبطل منك على الاقل 5 مرات

3-هيحطولك خطين بيض على الطريق...امشى فى اى حتة الا بين الخطين دول

4-هتركن ما بين قرطاسين بشرط انك توقع القرطاسين

ومبرووووك علينا الرخصة!

شوارع مصر..انت سقت فيها؟

أنا سقت فيها!

والسلام عليكم ورحمة الله وبركاته